Ворыла

Шумбрат!

Ловнат васенце Ворылань сёрмадовксонть. Бажамось содамс седе ламо ветинзить электроникань пачк ютыця сюлмавкстэнь эзга нолдазь лопантень, конань лемезэ ломанень ды лувозо од. Вансынек, мезесэ тевесь.

Ворыла чачсь шкасто, зярдо эрямочись кармась лиякстомомо а кемевиксстэ эрязасто. Куроксто велень-сядонь касомась-кепетемась моли ней уш кавтошка пингень перть васенце индустриянь революциястонть саезь. Те шкастонть коень-кирдань масторлангось лувонзо марто полавтовсь ды соракадовськак. Ломантне кармасть туеме эрямо покш ошотнева, косо аштить электричествасо валдомгавтозь китне, эрямо таркатне; сынь цитнить миненек колмоце валдокс чинть ды ковонть вакссо. Арднетяно лишмевтеме крандазтнэсэ, кучнетяно материявтомо сёрмат вейке-вейкенень. Мик сядо иеде икеле эриця ломанентень а маряволь те масторлангось содавиксэкс. Полавтовксось лиссь истя куроксто, нельнята а саты виенек чарькодемс эсь эрямочинек.

Ансяк те масторлангосонть минь ней эрятано, минь чачозьтяно истя те пингезэнть. Сеяк, ломанесь бажи содамс седе ламо, бажи чарькодемс эрямочинть. Куроксто полавтовиця эрямонть куншкасонзояк.

Чарькодемс эрямочинек, миненек эряви сонзэ невтемс истямокс кодамокс сон ашти, топавтомскак. Масторлангось мазый, масторлангось амазый, масторлангсонть ули весемесь човор. Минек эрьвань ули эсь коенек, эсь варштавксонок масторлангонть невтемекс.

Маряви, неень масторлангосонть се варштавксось, конанде чуросто арсетяно – те келесь, конань эйсэ невтсынек масторлангонть. Те варштавксось эрявикс секс, мекс келесь виевгавтсы арсеманок. Кельсэнть ёвтнетяно-лемдетяно пертьпельксэнек ды эрямонок. Ёвтнесынек эсь арсеманок-марямонок, мезекс нолдасынек тевс чарькодематнень, конатне пурнавить эрямонь перть.

Ломанесь чарькодьсы эсь прянзояк масторлангонть вельде. Ломаненть эсь прянзо чарькодемась моли ве шкане масторлангонть полавтоманзо марто. Келенть вельде явтано лиятнень марто сень, мезенть содасынек, машттано тееме, меленек-арсеманок, истя явтано эсь эрямочинек. Келесь секе шкастонть ашти кода эрвейкеень, истя вейсэнь келекс.

Сёрмадовксось, конань ловнат, улезе суомикс, эстонокс эли эрзякс – уралонь кельсэ. Уралонь кель – ниленьгеменьшка келень пусмонь лем, сааминь кельстэ саезь самоедэнь кельтнес. Уралонь кельтнень кортыцятне коень-кирдань вирьракшань кундыцят, калгундыцят, сокицят-видицят ды таркасто-таркас кильдеме марто якицят. Уралонь юркелекс ловить неень шкань Уралонь пандопулонь юрсо ниле тёжашка иеде икеле кортазь келенть, кона срадовсь меельцекс Евразиянь степьстэ саезь эень иневедьс. Истя кассть-кепететсть суоминь, эстононь, эрзянь кельтнеяк. Нейгак уралонь кельтнесэ кортыть чопода вирень мастор ёнсо эрицятне; весемеде покш уралонь кельсэ, мадяронь кельсэ, кортыть Паннониянь равнинасо ды Карпатиянь пандопулосо.

Валось уралонь сы келеньчинь тонавтомастонть, уралчись келень сюлмавксонть эйстэ седе келей. Уралчись сави вейсэнь юрокс, вейсэнь седикельксэкс ламо раскенень. Те седикельксэсь неяви течень чинеяк од эрямокойтнень лангс апак вано, секс мекс минь келенть вельде пачтятано седикельксэнть. Келесь канды мартонзо ламо. Келень кандозенть домка улемачись малавгады културань, оймечинь, масторлангонь чарькодемачинь ды философиянь вельде. Уралонь кельсэ кортамось сонсь канды эйсэнзэ чарькодема, тёжань иетнеде удалдо пачтязь превссаема, конат чарыть минек мельсэ нейгак.

Уралчись истя эри эйсэнек, эрьва чинь эскельксэнек эйсэ секс, мекс кортатано ломантнень марто эрьва чистэ, седе чуросто – эрьва таргосто. Нетне эрямонь эскелькстнэнь теемстэ мельсэнек аштить кудосо тонавтнезь масторлангсонть эрямонь питнечизэ ды ломаненть чарькодемачизэ. Питнечись, конань кисэ ашти Ворыла, те уралчинь арнемась ды кирдемась.

Эрьва келентень максозь видечи невтемс эрямочинть. Ансяк ней масторлангонь ламо кельтнесэ кортамось аламгады, седеяк пек информациянь технологиянть ламолгадомсто. Яла седе аламо нолдыть тевс лия кельть ломантнень ютксо вастневемасто. Седе покш кельтне сайсызь ломантнень мелест кортамс эсь кельсэ, масторлангостонть кортамось яла тееньгады, тевс нолдавить яла седе аламо келень масторлангонь чарькодевкст.

Ворылань аравтозь мелезэ истямо: анокстамс тарка уралонь келтнененьгак неень масторлангосо – сынесткак сави ды эряви улемс сыця шкастонть. Уралонь кельтнесэ эсь эрямочиде кортамось сюпалгавтсынзе кода уралонь кельтнень, истя весе масторлангонть. Ламо ёнкссто нолдазь тевс уралонь кельтне пачкодить седе васов сыця шкас.

Мельспаронь арсемат, эряза кортамот весенень!

Mainokset

Vastaa

Täytä tietosi alle tai klikkaa kuvaketta kirjautuaksesi sisään:

WordPress.com-logo

Olet kommentoimassa WordPress.com -tilin nimissä. Log Out /  Muuta )

Google photo

Olet kommentoimassa Google -tilin nimissä. Log Out /  Muuta )

Twitter-kuva

Olet kommentoimassa Twitter -tilin nimissä. Log Out /  Muuta )

Facebook-kuva

Olet kommentoimassa Facebook -tilin nimissä. Log Out /  Muuta )

Muodostetaan yhteyttä palveluun %s