2000-це пингень уралчись

Эрятано электроникань масторлангосонть. Информациянь технологиясь лиякстомизе минек веленек-сядонок рунгонтьгак. Яла седе ламо эрить ошокс теевезь пертьпелькссэнть рекламань, медиянь, покш кельтнень куншкасо. Уралонь варштавксонтень те масторлангось маряви лиятнень пельде путозекс. Аштезе кевсткемась суоминь, эстононь ды эрзянь кельтнеде, минь эрятано ломанень келень масторлангосонть, ней седеяк пек дигитальной вастневемань пертьпельксэсенть. Современной, урбанизировазь масторлангось кадизе веёнов коень-кирдань масторлангонть.

Истямо масторлангосонть кортить яля седе аламо коеде-кирдадо, коень-кирдань эрямодо. Ламотненень маряви электроникань масторлангось истямокс, кодамось эряви. Молить ташто коенть мельспаросо ванномо музейтнесэ, аволь вастовомо эсь юрост марто. Коень-кирдань эрямось-коесь полавтовсь, кува-кува юмаськак.

Мезе те канды уралонь раськетненень сыця шкатнестэ? Уралонь раськетне кассть-кепететсть тёжа иетнень перть, тонадсть эрямо полавтовиця пертьпелькссэнть-масторлангсонть. Уралонь келтнесэ невтеви, кода полавтовить шкатне, пертьпельксэнь ламоёнксоньчись эсензэ башкапельксэнзэ марто. Нетне келтнесэ невтеви пертьпельксэнть марто велув молиця эрямочись, пертьпельксэнть эрямочизе. Ансяк ней, снярдо коень-кирдань эрамочись кармась кадовомо вепелев, уралонь кельтне пачкодить кинь явома видьс.

Течи коень-кирдань културанть кирдить, минек мельспарокс, институциятнень вельде; улить раськень киштемань-морамонь кужот, музейть. Раськень романтикань шкастонть саезь раськень рунонь пурныцятне кортить сенде, кода ванстомс пурназенть. Секс музейтне теить покш тев культурань улипаронть ванстомстонзо.

Ансяк уралонь раськетне эрить од масторлангосонтькак. Минек ули нейгак, покш культурань полавтовксонь шкасто, тарканок масторлангосонть. Те шкасто ламот седе курок тонадыть од культурантень, сын а кармить поладомо коень-кирдань эрямо койтнень. Эрьва шкасто улить ломанть, конат бажить кадовомс седикелень шкас, улить истяткак, конатненень эряви од масторланго. Минек масторлангонок касы умок шкатнестэ саезь таштавксонть ды эсь бажамонок ютксо. Мезенть кочкасынек, сень коряс карми мезеськак кадовомо, мезеськак полавтовы.

Коень-кирдань ды неень шкань коряс эрямось а пекстыть вейке-вейкенть. Ансяк кода улемс сетнень марто, конат а сокить-а изыть, вирьракшат а кундсить? Чачома шкасто саезь коень-кирдань коряс эрямось сезеви, снярдо эйкакшонь пертьпельксэсь лиякстоми. Нейгак масторлангось одов лиякстомсь. Течень чинь информациянь пингестэнть одонтень тонадомась маряви аволь виень коряс, седеяк пек зярдо весемесь од. Содамочинь чадыведесь аволды масторлангонть велькска те шкасто. Ламот пелить – масторлангось лиякстоми пек куроксто.

Промыслась свал ары истя, кодамокс тееви эрямось; ансяк снярдо полавтови промыслась, сестэ арсемачись а свал полавтови. Раськень ве пингеде васов ютыця масторлангонь содамочись ашти ломантнень весемеде покш изнявксокс. Тень кувалма неень шкань содамочиськак чадыведень кондямокс теевсь. Минь минсь кастынек ды нейгак касттано эсь масторлангонок содазенть коряс. Эрьванень касы чарькодема сенде, мезе виде, мезе а виде, кона эрси а вейкетькс лиятнень чарькодеманть марто. Те весемесь пачкоди миненек васняяк кудоютконь келенть вельде.

Кудоютконь келенть эрявиксчизе пек покш эйкакшонь ёжомарямонь касомастонть – кудоютконь келень сюлмавксонть вельде эйкакшонть касы ёжомарямонь сюлмавксоськак тетянзо-аванзо, патянзо-ялаксонзо марто кортамстонзо. Ёжомарямонь улемачись, кона сы келень сюлмавксонть вельде, виевгавтсы эйкакшонть шумбрасто касоманзо. Вейке кельсэ кортамсто те моли эськанзо апак маря; ламо кельсэ кортамонть вельде сюлмавксось а пек кемекстави – келесь сюлмави седе аламо ломань марто. Невтемга, снярдо кортыть авань кудораськенть марто вейке кельсэ, тетянь кудораськенть марто омбоце кельсэ.

Келенть ламоёнксчинзэ теевемась, виевгадомась чуросто чарькодевсь койкс-кирдакс, ялатеке эряви меремс келесь касы-кемекстави тёжа иетнень перть. Эсь келесь касы койкс-кирдакс коень-кирдань велетнесэ-сядотнесэ. Истямо велетнесэ-сядотнесэ келесь невтсынзе ломаненть юронзо.

Истямокс келесь карми улеме, снярдо сонзэ аштемачинзэ кемекстазь. Апак кемекста аштемачись сайсы келенть виензэ. Уралонь раськетнень ютксо те маряви пек паросто – яла седе ламот уралонь тетятнестэ-аватнестэ кортыть эйкакшост марто покш кельсэ эсь кудокелест таркас. Сынест маряви, истя сынь шождалгавтсызь эйкакшонтень покш келень тонавтнеманть, кона эряви сыця шкастонть. Истя арсить виде-паро мельсэ, сынь лездыть эйкакшонтень; ансяк течи неяви, мезе те канды седе тов.

Неень информациянь пингень шкасто коень-кирдань келень кирдемась тееви яла седе стакакс. Содамочинь чадыведенть марто апокш велетнень-сядотнень кельтнень кирдемась стака, седеяк пек коень-кирдань китнень-янтнень марто. Ламотне, тевс апак нолда, ёмить.

Ялатеке, од шкастояк келесь кирдеви. Улить келть, конатне вельмезевсть, снярдо сынст коряс теезель сёрмадомань кель. Те тевентень путозель ламо вий, ансяк истя келесь туи эрямо од шкас. Информациянь технологиясь аволь ансяк тандавкс, сон одкставомаяк. Коень-кирдань виевгавтомасонть, невтемга, кельсэнть ули виде тевс нолдамс од кит-янт. Минь эрятано од масторлангосо, теке марто, паряк, масторлангонть невтемстэ нежедтяно коенек-кирданок лангс.

Уралчинь превс саемась те масторлангонь вановкстаркань содамось, видекс кирдемась. Ней, снярдо сась од пинге, уралонь кельтнень кортыцятнень сась шка муемс эсест туртов тарка эсензе информациянь технологиянь пертьпельксэнть эйсэяк. Минек арась меленек кадовомс вепелев масторлангостонть, эряви улемс сонзэ пельксэкс.

Mainokset

Vastaa

Täytä tietosi alle tai klikkaa kuvaketta kirjautuaksesi sisään:

WordPress.com-logo

Olet kommentoimassa WordPress.com -tilin nimissä. Log Out /  Muuta )

Google photo

Olet kommentoimassa Google -tilin nimissä. Log Out /  Muuta )

Twitter-kuva

Olet kommentoimassa Twitter -tilin nimissä. Log Out /  Muuta )

Facebook-kuva

Olet kommentoimassa Facebook -tilin nimissä. Log Out /  Muuta )

Muodostetaan yhteyttä palveluun %s